အိုမင်းစေသော အန္တရာယ်မဲ့ အပြုအမူများ

စီးကရက် သောက်တာနဲ့ ဆီကြော်စာတွေကို စားတာက နေလောင်ဒဏ်လိုပဲ အသားအရေ ထိခိုက်စေတာကို သင်သိပြီး ဖြစ်မှာပါ။  အခု ဖော်ပြပေးမယ့် အရာတွေကတော့ သင့်အနေနဲ့ အန္တရာယ် မရှိလောက်ဖူးလို့ ထင်ထားပေမယ့် အရွယ်တင် နုပျိုမှုကိုတော့ အကြီးအကျယ် ခြိမ်းခြောက်နေပါတယ်။

(၁) ကောလိပ်ကျောင်းသား အရွယ်ကဲ့သို့ အိပ်စက်ချိန် မပေးနိုင်တော့ခြင်း

အလုပ်များလွန်းတဲ့ အိမ်ရှင်မတစ်ယောက်၊ အလုပ်မှာ အရေးပါတဲ့ သူတစ်ယောက် အတွက်တော့ အိပ်ချိန်ကို အပြည့်အဝ မပေးနိုင်တော့ တာ ဖြစ်ကောင်း ဖြစ်နိုင်ပါတယ်။ အိပ်ချိန် နည်းပါးလွန်းတာက ကျန်းမာရေးအတွက် အလွန့်အလွန်ကို ဆိုးရွား လွန်းနေပါတယ်။ လေ့လာမှုတွေအရ အိပ်ချိန် နည်းလွန်းတာကြောင့် သွေးတိုးတာ၊ ဆီးချိုသွေးချိုရောဂါ ဖြစ်တာနဲ့ ကိုယ်အလေးချိန် တက်တာတွေအပြင် ပင်ပန်းနွမ်းနယ်ဟန် ပေါက်တာနဲ့ အိုမင်းတာတွေကို ဖြစ်စေနိုင်ပါတယ်။

အိပ်ချိန် ရှစ်နာရီ ပြည့်ပြည့်ဝဝတော့ ဘယ်ရနိုင်ပါတော့မလဲ။ ဒါပေမဲ့ အိပ်စက်တာကို ဦးစားပေးအဖြစ် ဆောင်ရွက်ပါ။ လူတိုင်းရဲ့ အိပ်စက်ချိန် လိုအပ်ပမာဏကတော့ မတူပါဘူး။ လူအများစုကတော့ အိပ်ချိန် ၇-၈ နာရီလောက် လိုအပ်နေပါတယ်။

 (၂) အချိုစာများ စားသုံးခြင်း

 သကြားပါတဲ့ သရေစာတွေဟာ သင့်ခါးတွေကို တုတ်လာစေပြီး အသားအရေကို နွမ်းနယ် စေကာ အရေးကြောင်းတွေလည်း ဖြစ်လွယ်တတ်ပါတယ်။ သကြားကို များများ စားလေလေ၊ ပိုပြီး မြန်မြန် အိုမင်းလာလေလေပါပဲ။ ဒီလို အိုမင်းတာက အသက် ၃၅ နှစ်လောက်မှာ သိသာလာတတ်ပြီး တဖြည်းဖြည်းနဲ့ မြန်မြန် အိုမင်းလာတတ်ပါတယ်။ သကြားကို ချက်ချင်း မစားဘဲ ရပ်ပစ်စရာတော့ မလိုပါဘူး။ ဒါပေမဲ့ သင်စားတဲ့ အစာစုစုပေါင်း ကယ်လိုရီရဲ့ ၁၀ ရာခိုင်းနှုန်းထက်တော့ ပိုမစား မိပါစေနဲ့။ သကြားလက်ဖက်စာဇွန်း ၁၀ ဇွန်းဟာ ကယ်လိုရီ ၁၆၀ နဲ့ ညီမျှပါတယ်။

(၃) မကြာခဏ စိတ်ဖိစီးမှု ခံစားနေရတတ်ခြင်း

သင့်အနေနဲ့ စိတ်ဖိစီးမှုကို ခံစားနေရရင် သွေးကြောထဲမှာ ကော်တီဆော ဟော်မုန်းနဲ့ နော်အက်ပီနက်ဖရင်တွေ များနေတတ်ကာ သွေးဖိအား တိုးလာပြီး ကိုယ်ခံစွမ်းအား လျော့နည်း နေတတ်ပါတယ်။ စိတ်ဖိစီးမှု ကြာကြာခံစားနေရရင် အနာကျက်နှုန်း နှေးကာ သွေးလွှတ်ကြောတွေကို မာကျောစေပြီး ဦးနှောက်ရဲ့ တွေးခေါ်နိုင်စွမ်း၊ မှတ်သားနိုင်စွမ်းနဲ့ စိတ်ခံစားမှုတွေပါ လျော့ကျ သွားတတ်ပါတယ်။ စိတ်ဖိစီးမှုက ဘယ်တော့မှ အပြည့်အဝ ပျောက်ကွယ်မသွားနိုင်ပါဘူး။ ဒါပေမဲ့ စိတ်ဖိစီးမှုကို ထိန်းချုပ် နေထိုင်နိုင်ရင်တော့ ဟော်မုန်းတွေကို အတန်အသင့် ထိန်းနိုင်ပြီး ကျန်းမာရေး ကိုပါ ကောင်းမွန် နေစေပါတယ်။ စိတ်ဖိစီးမှု များနေရင် တစ်နေ့နှစ်ကြိမ် အသက်ပြင်းပြင်း ရှူသွင်း၊ ရှူထုတ်တာကို လုပ်ဆောင်ပေးပါ။ တစ်ကြိမ်မှာ အချိန် နှစ်မိနစ်ပဲ ကြာပေမယ့် တကယ်ကို ထိရောက်မှု ရှိတဲ့ နည်းလမ်းကောင်း ဖြစ်ပါတယ်။

(၄) ကိုယ်အလေးချိန် ကျစေရန်အတွက်သာ လေ့ကျင့်ခန်းလုပ်ခြင်း

လေ့ကျင့်ခန်းဟာ ခန္ဓာကိုယ်ရဲ့ ဇီဝနရီကို အကောင်းဆုံး လုပ်ဆောင်စေနိုင်တဲ့ နည်းလမ်း တစ်ရပ်ပါ။ ဒါပေမဲ့ ကျွန်မတို့ အများစုဟာ လေ့ကျင့်ခန်းကို ကိုယ်အလေးချိန် ကျဖို့အတွက်ပဲ လုပ်ဖြစ်တတ်ကြပြီး ကျန်းမာရေးအတွက် လုပ်ရကောင်းမှန်း မေ့နေတတ်ပါတယ်။ တကယ်တော့ တက်တက်ကြွကြွ နေတာက ဦးနှောက်ပင်ပန်းမှုကို လျော့ကျစေတာ၊ ရောင်ရမ်းမှုကို လျော့နည်း စေတာ၊ အသားအရေ စိုပြည် လှပတာ၊ အမျိုးအစား(၂) ဆီးချိုသွေးချို ရောဂါတွေနဲ့ တခြား နာတာရှည်ရောဂါတွေကို မဖြစ်အောင် ကာကွယ်ပေးနိုင်တာ စတဲ့ ကောင်းကျိုးတွေကို ရရှိစေတာ ကြောင့် လေ့ကျင့်ခန်းကို ပုံမှန် လုပ်သင့်ပါတယ်။

အားကစားဖိနပ်ကို ဖုန်တက်တဲ့ အထိ ချောင်ထိုး မထားပါနဲ့။ သင်နှစ်သက်ရာ လေ့ကျင့်ခန်းကို တစ်နေ့ မိနစ်၂၀-၂၅ လောက် ရအောင် လုပ်ဆောင်ပေးပါ။ တကယ်လို့ ပင်ပန်းတတ်ရင် ၁၀ မိနစ်လောက် လေ့ကျင့်လိုက်၊ နားလိုက် လုပ်ပေးပါ။ ဒါကို အလေ့အထတစ်ရပ်လိုမျိုး လုပ်ဆောင် ပေးသင့်ပါတယ်။

 (၅) iPod ကို ကျယ်လောင်စွာ နားဆင်ခြင်း

သင့်နားတွေက ကောင်းကောင်း မကြားရတော့လို့ “တစ်ခေါက်လောက် ပြန်ပြောပါဦး” ဆိုပြီး ထပ်ကာထပ်ကာ ပြောနေရပြီလား။ အကြားအာရုံ ဆုံးရှုံးတာက ဖြည်းဖြည်းချင်း ဖြစ်တတ်တာမျိုးပါ။ iPod ကို အသံအကျယ်ကြီးနဲ့ ကြာကြာ နားထောင်ပါက အကြားအာရုံကို ထိခိုက် စေနိုင်ပါတယ်။

ဘယ်လို လုပ်သင့်သလဲ

iPod နားထောင်မယ် ဆိုရင် အသံ ပမာဏကို တတ်နိုင်သမျှ ခပ်နိမ့်နိမ့်ပဲ ထားပါ။ ဆူညံသံကို တွန်းလှန်ပေးနိုင်တဲ့ နားကြပ်ကို သုံးပါ။ ဖြစ်နိုင်ရင် သင့်ပတ်ဝန်းကျင်က တခြား ဆူညံသံတွေ ကြားတဲ့ အခါတိုင်း နားကို တစ်ခုခုနဲ့ ကာထားပေးပါ။

(၆) သူငယ်ချင်းများနှင့် မတွေ့ဆုံခြင်း

 သူငယ်ချင်းတွေဟာ သင်ရဲ့ ရှိရင်းစွဲ အသက်ကို ငယ်သွားအောင် စွမ်းဆောင် ပေးနိုင်ပါတယ်။ အားလပ်ချိန်တွေမှာ သူငယ်ချင်းတွေနဲ့ ချိန်းပြီး အချိန်ပေးကာ တွေ့ဆုံပါ။ လေ့လာမှု တစ်ရပ်အရ ခင်မင်မှုကို အလေးထားတာဟာ ရင်းနှီးဖွယ် ကောင်းတဲ့ မိသားစုဘဝထက်တောင် အသက်ရှည်စေတဲ့ အစွမ်းကို ရရှိစေကြောင်း သိရပါတယ်။ ဒါ့အပြင် နာတာရှည် ကျန်းမာရေး ပြဿနာတွေကိုလည်း မဖြစ်ပေါ်အောင် ကာကွယ်ပေးနိုင်ပါတယ်။

ဘယ်လို လုပ်သင့်သလဲ

သင်က အလုပ်များသူ ဖြစ်ပေမယ့် ပြက္ခဒိန်တစ်ခု ထားပြီး အချိန်ဇယားကို ရေးဆွဲထားပါ။ တကယ်လို့ အပြင်မှာ ဆုံတွေ့ဖို့ အခွင့်အရေး မရခဲ့ရင် Facebook လို၊ အီးမေးလို လူမှုရေး ကွန်ယက်တွေကို အသုံးပြုပြီး သူငယ်ချင်း အပေါင်းအသင်းတွေနဲ့ တွေ့ဆုံ ဆက်သွယ်နိုင်ပါတယ်။

 (၇) ဟင်းသီးဟင်းရွက်များကို နေ့စဉ် မစားဘဲနေခြင်း

သင့်အနေနဲ့ အင်တီ အောက်ဆီးဒင့်တွေရဲ့ အစွမ်းကို သိနားလည်နေပေမယ့် အင်တီ အောက်ဆီးဒင့်တွေ ပေါများစွာ ပါဝင်တဲ့ ဟင်းသီးဟင်းရွက်နဲ့ သစ်သီးတွေကို နေ့စဉ်များများ မစားဖြစ်ဖူး ဆိုရင် အရွယ်တင်နုပျိုတဲ့ အစွမ်းကို ရရှိမှု နည်းပါလိမ့်မယ်။ အစွမ်းထက် အင်တီ အောက်ဆီးဒင့်တွေဟာ အရေပြားနဲ့ ခန္ဓာကိုယ် ကျန်းမာရေးကို ထိခိုက်စေတဲ့ ဖရီးရယ်ဒီကယ်တွေကို ချေဖျက်ပေးတာကြောင့် အင်တီ အောက်ဆီးဒင့်ပါတဲ့ အပင်ထွက် အာဟာရတွေကို စားပေးသင့်တာ ဖြစ်ပါတယ်။

ဘယ်လို လုပ်သင့်သလဲ

တစ်ပတ်မှာ အနည်းဆုံး ငါးရက်လောက်တော့ သင်စားတဲ့ ထမင်းပန်းကန်ထဲ ဟင်းသီးဟင်းရွက် များများ ပါဝင်ပါစေ။ အရွယ်တင် နုပျိုအောင် အချိန် လေးနာရီကြာတိုင်း အင်တီ အောက်ဆီးဒင့်ပါတဲ့ သစ်သီးနဲ့ ဟင်းသီးဟင်းရွက်တွေကို စားပေးပါ။

(၈) အဆီစားသုံးခြင်း

သွေးလွှတ်ကြောတွေကို ပိတ်ဆို့စေတဲ့ ပြည့်ဝဆီနဲ့ ထရန့်စ်ဖက်စ်တွေဟာ နှလုံးရောဂါကို ဖြစ်စေနိုင်ပါတယ်။ ဒါကြောင့် ကျန်းမာရေးအတွက် ကောင်းတဲ့ မပြည့်ဝဆီ ဖြစ်တဲ့ ငါး၊ အခွံမာသီး၊ သံလွင်ဆီ စတာတွေကို စားပါ။ အိုမီဂါသရီး ဖက်တီးအက်စစ်ဟာ အိုမင်းမှုကို တားဆီးပေးတဲ့အပြင် နှလုံး၊ ဦးနှောက်၊ အရိုးစတဲ့ ခန္ဓာကိုယ်တွင်းစနစ်ကိုပါ ကျန်းမာနေစေပါတယ်။

ဘယ်လို လုပ်သင့်သလဲ

ကျန်းမာရေးနဲ့ ညီညွတ်တဲ့ အဆီကို ရွေးချယ်စားပါ။ အထူးသဖြင့် အဆင်သင့် အစားအစာတွေကို ဝယ်ယူတဲ့အခါ အညွှန်းကို သေချာဖတ်ကြည့်ပြီးမှ ဝယ်ပါ။

 (၉) နောက်ဆုံးအကြိမ် Sex ကိစ္စကို မမှတ်မိတော့ခြင်း

အိမ်ထောင်ရှိသူတွေ အနေနဲ့ Sex ကိစ္စကြောင့် ကိုယ်ခံစွမ်းအားစနစ် မြင့်တက်တာ၊ နာကျင်မှု လျော့ပါးတာ၊ ကင်ဆာ အန္တရာယ် လျော့နည်း တာ၊ နှလုံးကျန်းမာတာနဲ့ စိတ်ဖိစီးမှု လျော့ကျတာတွေကို ဖြစ်စေနိုင်ပါတယ်။ ဒါ့အပြင် မလွန်ကဲတဲ့ ပုံမှန် Sex ကိစ္စဟာ အရွယ်တင် နုပျိုစေနိုင်ပါတယ်။

ဘယ်လို လုပ်သင့်သလဲ

အိမ်ထောင်သည်တွေ ကြားမှာ ထိတွေ့မှု များတာဟာ စိတ်ခံစားမှု မြင့်တက်ပြီး သာယာ ပျော်ရွှင်ဖွယ်ရာ အိမ်ထောင်ရေးကို တည်ဆောက်နိုင်ကြောင်း လေ့လာသူတွေက ဆိုပါတယ်။